Шанхай Мажорын Нээлтийн шат дууслаа

Бидний хүсэн хүлээсэн Мажор тэмцээний дараагийн Elimination шатанд бүс бүсээс шалгарсан 16 багийн найм нь дараагийн Хасагдах шатанд шалгарах юм.

Энэ удаагийн Мажорын онцлог нь бидний амьдардаг Ази, Номхон далайн бүс 3 эрхтэй болсон явдал юм.

Хэтэрхий том газар нутгийг хамарсан, 51 орны баг тамирчдын дунд ердөө хоёрхон эрхтэй байсныг манай улсын The MongolZ баг өөрчилж, өмнөх Мажор тэмцээндээ Хасагдах шатанд шалгарсан тул бүсдээ нэг эрхийг авч ирж бидэнд 3 эрхийн төлөө өрсөлдөх боломж гарсан юм.
3 слотын сургаар улс тус бүрийн шалгаруулалтад өрсөлдөх багуудын тоо эрс нэмэгдсэний нэг жишээ нь Хятадын нээлттэй шалгаруулалт гэхэд л мянга гаруй багууд өрсөлдсөн.
Түүгээр ч зогсохгүй дүрмийн цоорхойг ашиглан цаашид анхаармаар үйлдэл болсон нь бидний огт мэддэггүй Левант болон Хойд Африкийн дэд бүсээс DRILLAS баг Азийн шалгаруулалтад (Asian RMR) өрсөлдсөн явдал юм.
CS2 бол Европ, Америкт чадварлаг багууд ихтэй, тэндээ дэд бүтэц нь сайн хөгжсөн, эко систем нь тогтворжсон байдаг.
Хөгжүүлэгч нь тоглоомынхоо зах зээлийг тэлэхийн тулд, шинэ баг тоглогчид гаргахын тулд, магадгүй манай The MongolZ-ийн нөлөөгөөр Ази ямар шуухан байна вэ гэдгийг “танадах” гэж Дэлхийн Аваргын тэмцээнээ Шанхай хотод хийхээр төлөвлөсөн байж болох.
Саяхан Бразил улсын Рио хотод болсон IEM тэмцээний дараа зохион байгуулагчийн зүгээс дараагийн тэмцээнээ Рио хотод зохиохгүй гэдгээ зарласан. Миний уншсан эх сурвалжуудаас тэмцээний зохион байгуулалт, тамирчдын аюулгүй байдал гэх мэт асуудлууд учир дутагдалтай байсан бололтой.

Манай бүсийн 3 багийн амжилт

The MongolZ

Мэдээж The MongolZ баг өмнөх Мажоруудаас илүү амжилт үзүүлж чадлаа.

The MongolZ баг эхний тоглолтдоо Хятад улсын Rare Atom багийг Anubis map дээр 13-2 гэсэн харьцаатай хожлоо.

Хоёр дахь тоглолтоо Бразил улсын MIBR багийн эсрэг хийн Ancient map дээр 13-6 гэсэн харьцаатай хожлоо.

Нээлттэй шатны гурав дахь тоглолт нь шийдвэрлэх тоглолт байсан юм. Тоглолтын формат Bo3, дараагийн шат руу шилжих эсэхээ шийдвэрлэх тул маш хариуцлагатай тоглолт болов. GamerLegion багийг Mirage, Anubis map-ууд дээр хожиж, 3-0 гэсэн амжилттай Хасагдах шатанд (Elimination stage) шалгарлаа. Counter Strike төрлийн мэргэжилтэнүүдийн олонх нь The MongolZ багийг 3-0 гэсэн амжилттайгаар дараагийн шатанд шалгарна гэж байсан.

FlyQuest баг

FlyQuest баг хэдийгээр Америкийн байгууллага боловч, багийн тоглогчид Австрали улсын тамирчид тул Ази, Номхон далайн бүсэд хамрагддаг. Саяхан болсон ESL Challenger тэмцээнд тэргүүн байрыг авсан тэд Мажор тэмцээнд өндөр амжилт гаргана гэсэн хүлээлт байсан. FlyQuest баг эхний хоёр учраа Complexity, BIG багуудыг хожиж, тэмцээнээ ялалтаар эхлүүлсэн ч дараагийн учраа Team Liqiud-тэй эхний map дээр хожсон ч дараагийн хоёр map, тэр ч бүү хэл дараагийн хоёр баг paiN, MIBR багуудад хожигдож харамсалтайгаар тэмцээнээ өндөрлүүллээ.

Rare Atom

Манай бүсэд ядаж хоёр эрхтэй байсан гавьяаг Tyloo багт өгөх нь зүйтэй болов уу. Азийн, тэр дундаа Хятадын counter strike-ийн суурь Европийн багуудыг гүйцэхгүй ч, биднийг сул байх үед Хятадын багууд хүчтэй байсан үе бий.

Хэдийгээр Tyloo баг сүүлийн үед маш тааруу амжилттай байгаа ч энэ удаагийн Хятадын шалгаруулалтаар Rare Atom баг Азийн RMR тэмцээнээс эрхээ авсан.

Rare Atom баг тэмцээнийг хоёр ялагдлаар эхлүүлсэн ч (The MongolZ, Virtus.Pro багуудад ялагдсан) Fnatic багийн хувьд “гэрийн зүг хүлгийн жолоо залах” шалтгаан нь болж тэднийг ялсан юм. Бразилын MIBR багт 1-2 гэсэн харьцаатай хожигдож тэмцээнээ өндөрлүүллээ.

Шанхай Мажорын Нээлтийн шат дуусч Хасагдах шатны оноолтууд гарсан байна.