Бидний араншин буюу цорын ганц The MongolZ минь

Elisa Masters Espoo тэмцээнээ өндөрлүүлсэн The MongolZ (минь) багийг өмөөрч бичиж байгаа тул уур нь хүрээд, уушиг нь сагсайгаад байгаа нөхдүүд алгасаад, алгасаад явчихаарай.

Дөчхөн минутын өмнө хайр сэтгэлээр булж байсан “өнөөх дэмжигчид” нь хожигдмогц л хараалын үгийг хайр найргүй урсгаж байгааг хараад өөрийн эрхгүй дуугарах ёстой гэж бодоод бичиж сууна.

The MongolZ гэж хэн бэ?

• The MongolZ энэ бол цахим спортын дэлхийн тавцанд биднийг таниулж байгаа монгол гэдэг нэрийг, үгийг оруулсан ганц брэнд.

• “Олон” жилийн спортын замнал нь унаж ч явсан, босож ч явсан; нийлж ч явсан, салж ч явсан. Байдаг, байх ёстой түүх; бас замнал нь.

• Юун цахим спорт, “муусайн ПиСи-чид гэж дуудуулж явсан тэр үед гадаадын багуудын ноу хау-г чирч ирж Монголдоо нутагшуулсан.

• Монголын Counter-ийнхны “адуу” шиг aggressive тоглолтыг барууныханд үзүүлсэн, бас тэдний судалгааны обьект болчихсон.

• Саяхан ш дээ, саяхан. Ази тивээсээ Хятадын багуудаас өөр үзэж харах юмгүй байсан нь үнэн биз дээ.

• Юун Мажор, ESL Challenger, ESL Pro League, Азийн RMR, за тэр Европ, Америк бол бүүр цаашаа байсан үе өчигдөрхөн, дүү нар минь.

• Бидний цахим спортын түүх, The MongolZ-ийн цахим спортын түүх хоёр бараг л чацуу. Тийм болохоор байгууллага нь ч, үзэгчид нь залуу байна. (Надаас бусад нь)

• Тэд өнөөдөр “Цахим спорт бол салбар” гэдгийг байгууллагынхаа сүүлийн үед гүйцэтгэж байгаа олон үйлдлээрээ бидэнд харуулсаар.

• Зөвхөн Counter Strike төдийгүй, PUBGM, MLBB, Valorant төрлүүдэд үйл ажиллагаагаа өргөжүүлсэн. Тэдгээр багууд нь ч бас чамгүй амжилттай яваа.

• Өөрийн мэрчийг (тоглолтын өмсгөл, хөгжөөн дэмжигчдэд зориулсан мэрч) гадаадын том том багуудын адил зөвхөн Монголдоо биш олон улсад гаргасан.

• Байгууллага нь Олон улсын том том org-ууд шиг болоод дотроо цахим спортын төрлүүдийн ажлын арын албатай болчихсон, бэлтгэл сургуулилтын байр нь хамгийн сүүлийн үеийн техникээр тоноглогдчихсон.

• Зөвхөн Монголын төдийгүй гадаадын мэргэжилтнүүдийг багтаа ажиллуулж байгаа, бид л мэдээгүй болохоос.

Анхны, мэргэжлийн, бие даасан, Монгол эзэнтэй, Монгол удирдлагатай, Монгол байгууллага. Тэд маш их хичээж байгаа.

Зураг: ESL Atlanta Challengers. 2023 онд

Илүү их юм хүсээд, илүү ихийг шаардаад байгаа нь (монгол) хүний л араншин байх.  Бид, үзэгчид нь хөгжөөн дэмжигчид нь хичээх цаг нь болсон.

Олон нийтийн сүлжээний талбар нь аль болох нь олон хүн олон коммент бичиж байвал дээшээ гарч олны нүдэнд өртөж байдаг алгоритмтэй.

• Бид алгоритм дагаж амьдрах уу, асуудлаа ярилцаж санал бодлоо солилцож амьдрах уу?

• Харааж, муулж, мунхаг ухаанаар биш, харин ч авч болох саналтай, бодож болох зөвлөгөөтэй шүүмж бичдэг залуус байгаа. Тийм бичвэрүүдийг би өөрийн вэбсайт дээр зөвшөөрөлтэйгээр оруулдаг. Цахим спортын аналитикууд гадаадад ч дотоодод ч ховор байна. Монгол залуус минь хэдий олон бичнэ, төдий чинээ л сайжирна.

  Тэгж байж энэ салбар хөгжинө. Баталгаатай, судалгаатай, тоон үзүүлэлттэй бичдэг хүн байж энэ салбар хөгжинө.

• Trah talk, Bully, threatening бүгд ялгаатай. Бидний зарим маань trash talk нь бүүр дараа дараагийн шатандаа орчихоод байна.

The MongolZ төдийгүй олон улсын түвшинд гарах гэж хичээж яваа олон залуус, багуудад энэ бүгд хамааралтай. Сүүлийн үед олон нийтийн сүлжээн дээр дайрч давшлах, хараах нь бүүр хэмээс хэтэрлээ. Хэнийг ч байсан, ямар ч баг байсан аль муу муухай үгээр дайрч доромжилж байна. Оны сүүлчээр өндөр зэрэглэлийн CS2, Dota2, PUBGM, MLBB, Valorant хэд хэдэн тэмцээнд манай багууд оролцоно. Тэд бидний нэг, бид тэдний нэг. Бид цөөхүүлээ.

Би та нарт ганц л үг хэлье. Тэр хараагаад байгаа нөхдүүдийг аль ч платформ дээр, аль ч пэйж групп дээр тоохгүй л хаячих. Пэйж, группийн админууд нь арга хэмжээ авна биз.

Энэ тэмцээн ямар ач холбогдолтой вэ?

Манай улсын The MongolZ баг Elisa Esports Espoo тэмээнд урилгаар оролцсон нь

• Азийн Counter Strike-ийн чансааг харуулах

• Сүүлийн үед маш хурдтай нэр хүнд нь өсч байгаа Монголын The MongolZ багийн тоглолтыг финлянд залуучуудад харуулах

• Хэдийгээр шахуу хуваарьтай ч 11-р сард эхлэх Азийн RMR, цаашлаад Шанхай Мажорын бэлтгэл зэрэг олон ач холбогдолтой байсан юм.

Тэмцээний хэсгийн шатнаас харахад л Play Off-д шалгарах нь тодорхой байсан.

Тийм ч учраас үзэгчид хөгжөөн дэмжигчид бидний хүлээлтэд хүрч Play Off-д шалгарсан.

Тэгээд одоо яах гээд байгаам?!

Нийтлэлийг бичсэн: Ю.Ариунзаяат “zay0”