PUBG MOBILE-ийн зохион бүтээгч Level Infinite компани 2025 оны Esports-ийн улирлын талаар хэд хэдэн шинэ мэдээлэл зарлажээ.
Ирэх онд зохион байгуулагдах тэмцээнүүдэд зориулан нийт 10 сая ам.долларын шагналын санг төсөвлөж байгаа бөгөөд Үндэсний түвшний тэмцээнүүдэд дэмжлэг үзүүлэх юм. Мөн PUBG MOBILE нь 2025 оны Esports World Cup тэмцээнд багтана гэж мэдэгджээ.
Level Infinite-ийн захирал Жэймс Янгийн удирдсан хэвлэлийн бага хурлын үеэр PUBG MOBILE Global Championship-ийн Grand Finals-ийг анх удаа Лондон хотод зохион байгуулах талаар дэлгэрэнгүй мэдээллээ. Тус тэмцээнд 16 баг оролцох бөгөөд 3 сая ам.долларын шагналын сантай байна. Жэймс Янг энэхүү финалын тэмцээнийг Баруун Европын бүс нутагт зохион байгуулж буй хамгийн том арга хэмжээ гэж онцолж байлаа.
Ирэх онд Level Infinite нь үндэсний түвшний тэмцээнүүдэд илүү их хөрөнгө оруулах бөгөөд нийт 22 бүс нутагт албан ёсны тэмцээн зохион байгуулна. Эдгээр тэмцээнүүдээс шалгарсан шилдэг багууд бүс нутгийн PUBG MOBILE Super League тэмцээнд оролцох бөгөөд улмаар PUBG MOBILE World Cup болон Global Championship-д өрсөлдөх боломжтой болох юм.
Battle Royal төрлийн тоглоомууд, тэр дундаа гар утсанд зориулсан PUBG MOBILE тоглоомыг “сурахад хялбар, мастер түвшинд хүрэхэд хэцүү” гэж Янг онцлов. Энэ нь олон тоглогчдод сонирхолтой байх үндэслэл болдог бөгөөд үндэсний түвшний тэмцээнүүдийг өргөжүүлснээр илүү олон тоглогчдыг PUBG MOBILE Esports-ийн ертөнцөд татахыг зорьж байгаа аж.
Шагналын сан, хамтын ажиллагааны хөтөлбөр
2025 онд 10 сая ам.долларын шагналын санг төсөвлөсөн нь тоглогчид, багуудыг дэмжихэд чиглэгдэнэ. Тус хөрөнгө нь томоохон тэмцээнүүдээс гадна үндэсний түвшний жижиг тэмцээнүүд, PUBG MOBILE-ийн багуудад зориулсан хамтын ажиллагааны хөтөлбөрт зориулагдах юм.
Жэймс Янг хэлэхдээ “Хэрэв үндэсний түвшний тоглогчид нэмэгдвэл бид илүү их хөрөнгө оруулахад баяртай байх болно” гэжээ.
Түүнчлэн, 2025 оны хамтын ажиллагааны хөтөлбөрийн талаар дурдахдаа, бага зэрэг өөрчлөлт орно гэдгийг онцоллоо. Хэрэв хамтрагч багуудын гүйцэтгэл муу байвал бусад багуудад оролцох боломжийг олгох бөгөөд энэ нь Esports-ийн өрсөлдөөнийг нэмэгдүүлэх зорилготой.
PUBG MOBILE 2025 онд хэд хэдэн томоохон олон улсын тэмцээн зохион байгуулна:
PUBG MOBILE Global Open (PMGO) - Узбекистан улсад гурав, дөрөвдүгээр сард болно.
PUBG MOBILE World Cup - Саудын Арабын Рияд хотод зун зохион байгуулагдана.
PUBG MOBILE Global Championship - Тайланд улсад жилийн сүүлчээр болно.
Comments