Хятадын электроникийн компани Huawei өөрийн Android аппликейшны дэлгүүр болох Huawei AppGallery нь Emirates Esports Federation (EESF)-тэй хамтын ажиллагааны Санамж бичиг (MoU) байгуулсан тухай зарлалаа.
Мэдэгдэлд дурдсанаар, Арабын Нэгдсэн Эмират Улсын (АНЭУ) засгийн газрын дэмжлэгтэй esports холбоо болох EESF нь Huawei AppGallery-тай хамтран esport болон гар утасны тоглоомын экосистемийн инновац, өсөлтийг дэмжихээр ажиллах ажээ.
Хамтын ажиллагаа нь орон нутгийн авьяастнуудыг дэмжих, тоглогчид болон хөгжүүлэгчдэд шинэ боломжуудыг нээхэд голчлон анхаарна. Үүний хүрээнд Huawei AppGallery болон EESF нь тэмцээн, кампанит ажлуудыг хамтран зохион байгуулах юм.
Тус холбоо нь Huawei AppGallery-ийн тоглогчдын дунд зохиогдох Gamers Cup тэмцээнийг засгийн газрын дэмжлэг, мэргэжлийн тоглогчдын тусламжаар хангахыг зорьж байна. Үүнээс гадна, гэрээний хүрээнд EESF нь Huawei AppGallery платформ дээрх гар утасны тоглоомыг сурталчлах юм.
Санамж бичигт Emirates Esports Federation-ийн ерөнхийлөгч, Эрхэм дээдэс Шейх Султан Бин Халифа Бин Султан Бин Шахбүүт Аль Нахайян болон Huawei Consumer Business Group-ийн Ойрхи Дорнод ба Африк бүсийн Экосистем хөгжүүлэлт, үйл ажиллагааны захирал Уильям Ху нар гарын үсэг зуржээ.
Мөн санамж бичиг дэх санхүүгийн нарийвчилсан мэдээллийг нийтэд зарлаагүй байна.
Уильям Ху хамтын ажиллагааны талаар хэлэхдээ:
“Emirates Esports Federation-тай хамтран ажиллах нь esports болон гар утасны тоглоомын ирээдүйн талаарх бидний алсын харааг хэрэгжүүлэхэд чухал алхам болж байна. Бид хамтдаа инновацын хөгжлийг урагшлуулахын зэрэгцээ тоглогчид болон хөгжүүлэгчдэд амжилтад хүрэх таатай орчин бүрдүүлэх платформыг бий болгож байна. АНЭУ-ын тоглоомын экосистем хурдтай хөгжиж байгаа нь esport-ийн ирээдүйг тодорхойлох тохиромжтой төв болж байна.”
Comments