BetBoom баг Tundra Esports багийг аваргын тоглолтод 3-1 харьцаатай хожиж Dota 2-ын BLAST Slam цувралын анхны аварга боллоо. Ингэснээр BetBoom баг Dota 2-ын ертөнцөд хөл тавьснаасаа хойш анх удаа дэлхийн хэмжээний томоохон тэмцээнд түрүүлж байгаа юм.
BLAST Slam тэмцээн нь бусад Dota 2 тэмцээнүүдээс ялгарах өвөрмөц форматаар явагддаг. Эхний шатанд бүх багууд тойргийн системээр тоглож, тэндээс "King of the Hill" буюу шатлан тоглох тоглолтын байрлалаа тодорхойлдог. Бүлгийн шатанд тэргүүлсэн багууд шууд хагас шигшээд орж, доод байруудтай багууд өмнөх шатнаас тоглож эхэлдэг байна.
BetBoom болон Tundra Esports багууд өөрсдийн хэсэгт эхний байраар шалгарсан. BetBoom баг А хэсэгт 3-1 харьцаатай, харин Tundra Esports баг В хэрэгт 4-0 харьцаатай хэсгийн тоглолтоо дуусгажээ. BetBoom баг бусад багуудаас онцгойрч байсан нь үндсэн бүрэлдэхүүний mid laner Gleb “kiyotaka” Ziryanov тэмцээнд оролцох боломжгүй байсан тул хуучин mid laner Danil “gpk” Skutin-ийг орлон тоглуулсан явдал байлаа.
Хагас шигшээ шатанд BetBoom баг PARIVISION-ийг хожиж, Tundra Esports баг Xtreme Gaming-ийг хожсоноор аваргын тоглолтод шалгарч үлджээ.
Аваргын тоглолтын явц
BetBoom баг эхний тоглолтод Ivan “Pure” Moskalenko (Drow Ranger), Matvey “MieRo” Vasyunin (Magnus) нарын гайхалтай тоглолтын ачаар Tundra Esports багийг 42 минутын дотор, 25-9 харьцаатайгаар хожжээ.
Tundra Esports баг хоёр дахь тоглолтод Spectre баатартай Egor “Nightfall” Grigorenko-гийн ачаар 46 минутын тоглолтын дараа ялалт байгуулж, харьцааг тэнцүүлсэн байна.
Гурав дахь тоглолтод BetBoom баг Alchemist баатартай Pure болон Pangolier баатартай "gpk"-ийн ачаар 56 минутын дараа ялалт байгуулж, цувралыг 2-1 болгосон.
Сүүлийн тоглолтод BetBoom баг Morphling баатартай Pure-ийн удирдлага дор 34 минутын дотор тоглолтыг шийдвэрлэж, Tundra Esports багийг 3-1 харьцаатай буулган авлаа.
BLAST Slam I тэмцээн нь Counter-Strike тэмцээнүүдээр алдартай BLAST компанийн Dota 2-ийн ертөнцөд нэвтэрсэн анхны томоохон төсөл байлаа. 2026 он хүртэл BLAST Slam цувралын 8 тэмцээнийг зохион байгуулахаар төлөвлөсөн бөгөөд дараагийн тэмцээн 2025 оны хоёрдугаар сард болох BLAST Slam II байх юм.
Comments